Logo_Dahabshiil_cusub New-Village Latest-Nationlink1 (1) TawakalExpress
| | 423 views

Beelo ku dagaalamay gobolka Hiiraan oo heshiis rasmi ah la dhex dhigay + Sawirro

Magaalada Balad Weyne ee xarunta Gobolka Hiiraan waxaa maanta ka dhacay heshiis rasmi ah oo ay gaareen laba beel oo ay dhex mareen dagaallo soo noqnoqday, waxaana kulan ay yeesheen waxgaradka beelaha dagaalamay, guddiga dhex dhexaadinta labada beelood, waxgaradka reer Hiiraan, maamulka gobolka iyo saraakiil ka tirsan ciidamada AMISOM.

Ugaas Xasan Ugaas Khaliif oo ka mid ahaa hoggaamiye dhaqameedka gobolka Hiiraan ayaa halkaasi khudbad xasaasi ah ka jeediyay, isagoona tilmaamay in dagaalada u dhaxeeya labada beelood la siyaasadeynayo.

“Laba kooxood oo ka kala tirsan labada dhinac ayaa ka dambeeya colaada soo laalaabatay shacabkuna ma oga, waayo xiriir baa ka dhaxeeya magaalada ayayna wada joogaan” ayuu yiri Ugaas Xasan Ugaas Khaliif.

Ugaas Xasan ayaa ugu baaqay labada beel ee heshiiska gaaray inay ka shaqeeyaan nabadda gobolka Hiiraan isla markaana tixgeliyaan qodobadii ay wada saxiixdeen, taasi oo uu sheegay inay asaas u tahay nabad ka dhacda beelaha dagaalamay.

Dhinaca kale waxaa kulankaan ka hadlay saraakiil ka tirsan ciidamada Midowga Afrika ee AMISOM oo ka socda dalalka Jabuuti iyo Itoobiya, waxayna ku booriyeen waxgaradka iyo odayaasha dhaqanka labada beel in laga wada shaqeeyo nabadgelyada, iyagoona sheegay in dhinacii jebiya heshiiska ay tallaabo ka qaadi doonaan.

Ma aha markii ugu horeysay oo labadaan beel dagaal ku dhex maro gobolka Hiiraan isla markaana heshiis la dhex dhigo, iyadoo kulankii maanta uu ahaa mid ay dardaaran culus ka jeediyeen maamulka gobolka Hiiraan, ciidamada AMISOM iyo guddiga dhexdhexaadinta.

Short URL: http://somaliwayn.org/?p=50281

Comments are closed

Dalbo wararkeena

Si aad u hesho wararkeena halkaan hoose geli Emailkaaga.

Keydka Wararka

taaj